کراچی: اسٹیٹ بینک نے الیکٹرک موٹرسائیکل، رکشے اور لوڈر فراہم کرنے کے لیے اسکیم متعارف کرادی۔
اسٹیٹ بینک کے مطابق اسکیم کی گاڑیاں 2 مرحلوں میں فراہم کی جائیں گی، اسکیم کے تحت ایک لاکھ 16 ہزار الیکٹرک بائیکس، 3170 رکشے اور لوڈرز فراہم کیے جائیں گے۔
اسٹیٹ بینک حکام کا بتانا ہےکہ ای بائیکس کے لیے 2 لاکھ روپے قرض دیا جائے گا جب کہ الیکٹرانک رکشےاور لوڈرزکے لیے 8 لاکھ 80 ہزار روپے قرض دیا جائے گا۔
اسٹیٹ بینک کے مطابق پہلے مرحلے میں 40 ہزار ای بائیکس، ایک ہزار ای رکشے اورلوڈرز فراہم کیے جائیں گے جب کہ دوسرے مرحلے میں 76 ہزار ای بائیکس، 2171 ہزار رکشے اورلوڈرز دیے جائیں گے۔
مرکزی بینک کا کہنا ہےکہ ای بائیکس قرض 2 سال اور ای رکشہ قرض 3 سال کے لیے ہوگا، قرض کی پرائسنگ اسلامی اور روایتی بینک، کائیبور پلس 2.75 فیصد پر ہوگی جب کہ صارف کو قرض صفر فیصد مارک پر ملے گا۔
اسٹیٹ بینک حکام نے مزید بتایا کہ 25 فیصد ای بائیکس خواتین کو فراہم کی جائیں گی، 10فیصد ای بائیکس کاروبار کرنے والے افراد، کوریئرز کو فراہم ہوں گی جب کہ فلیٹ آپریٹرز کو 30 فیصد رکشے اور لوڈرز فراہم کیے جائیں گے۔
Scheme introduced to provide electric bikes, rickshaws and loaders to the public